ໃນວັນທີ 04 ທັນວາ 2024 ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງ ເຕັກໂນໂລຊີ ແລະ ການສື່ສານ (ຄກມດ ກຕສ) ໄດ້ຈັດຂະບວນການລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ 2024 ພາຍໃຕ້ຫົວຂໍ້:“ກ້າວໄປສູ່ 30 ປີ ແຫ່ງການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງ: ຮ່ວມກັນເພື່ອຢຸດການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ”, ໂດຍການເຂົ້າຮ່ວມເປັນປະທານກ່າວເປີດ ຂອງ ທ່ານ ປອ ສັນຕິສຸກ ສິມມາລາວົງ, ຮອງລັດຖະມົນຕີ, ປະທານຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກຕສ, ,ມີບັນດາທ່ານຄະນະກົມ/ທຽບເທົ່າ, ພະນັກງານ ແລະ ນັກສຶກສາ ອ້ອມຂ້າງ ກຕສ ເຂົ້າຮ່ວມ ຈຳນວນ 300 ກວ່າທ່ານ.

ຈຸດປະສົງເພື່ອ​ໂຄສະນາປູກ​ຈິດ​ສຳ​ນຶກ, ສົ່ງ​ເສີມ​ຄວາມ​ຮັບ​ຮູ້ ແລະ ຄວາມ​ເຂົ້າ​ໃຈໃຫ້ພະນັກງານ-ລັດຖະກອນ ກະຊວງເຕັກໂນໂລຊີ ແລະ ການສື່ສານ ເພື່ອປັບປ່ຽນທັດສະນະຄະຕິ ແລະ ພຶດຕິກໍາທີ່ສະໜັບສະໜູນການເລືອກປະຕິບັດ ແລະ ການໃຊ້ຄວາມຮຸນແຮງຕໍ່ແມ່ຍິງ ທັງເພື່ອເປັນການຈັດຕັ້ງຜັນຂະຫຍາຍແຜນດໍາເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 05 ປີ ຄັ້ງທີ IX (20212025) ແລະ ແຜນດໍາເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ 05 ປີ ຄັ້ງທີ II (2021-2025) ທີ່ຕິດພັນກັບພາລະບົດບາດຂອງ ກະຊວງເຕັກໂນໂລຊີ ແລະ ການສື່ສານ.

ທ່ານ ປອ ສັນຕິສຸກ ສິມມາລາວົງ ໄດ້ກ່າວບາງຕອນວ່າ: ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນບັນຫາທີ່ເກີດຂຶ້ນດົນນານມາແລ້ວໃນທົ່ວໂລກ ແລະ ປັດຈຸບັນກໍເປັນປະກົດການຫຍໍ້ທໍ້ອັນໜຶ່ງໃນສັງຄົມ ແລະ ສົ່ງຜົນກະທົບທາງລົບຕໍ່ການພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະ ແມ່ນກະ​ທົບຕໍ່ຮ່າງກາຍ, ຊີວິດຈິດໃຈ, ​ຕະຫຼອດ​ເຖິງ​ຊັບ​ສິນຂ​ອງແມ່ຍິງ ແລະ ເດັກ​ຍິງ. ໜຶ່ງໃນນັ້ນກໍແມ່ນຄວາມຮຸນແຮງຜ່ານທາງດິຈິຕອນທີ່ມີຜົນກະທົບອັນໃຫຍ່ຫຼວງ ຕໍ່ຜູ້ຖືກເຄາະຮ້າຍ ຫຼື ຜູ້ລອດຊີວິດ.

ເຊິ່ງຂະບວນການດັ່ງກ່າວໄດ້ຈັດເວທີເສວະນາ ໃນຫົວຂໍ້: “Stop Cyber Bullying’’ ເພື່ອເປັນບ່ອນລິເລີ່ມໃນການຈັດຕັ້ງປະຕິບັດຊອກຫາວິທີຮັບມື, ປົກປ້ອງ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກຍິງ ຜ່ານທາງດິຈິຕອນຮ່ວມກັນ ເຊັ່ນ: ວິທີແກ້ໄຂ, ກໍລະນີສຶກສາຜົນກະທົບຈາກການເຢາະເຢີ້ຍ, ການໃສ່ຮ້າຍປ້າຍສີຜ່ານສື່ດິຈິຕອນ, ອຸປະສັກ, ສິ່ງທ້າທາຍທີ່ພົບເຫັນໃນປັດຈຸບັນ, ສະຖິຕິຂອງໄພຄຸກຄາມຜ່ານສື່ດິຈິຕອນ ແລະ ອື່ນໆ ໂດຍການເຂົ້າຮ່ວມເປັນວິທະຍາກອນຈາກ ກະຊວງປ້ອງກັນຄວາມສະຫງົບ (ກົມໃຫຍ່ສັນຕິບານ), ສູນກາງສະຫະພັນແມ່ຍິງລາວ (ສູນໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ), ສູນສົ່ງເສີມ ແລະ ຖ່າຍທອດເຕັກໂນໂລຊີ, ກົມຄວາມປອດໄພໄຊເບີ ແລະ ນັກສຶກສາຈາກສະຖາບັນເຕັກໂນໂລຊີການສື່ສານຂໍ້ມູນຂ່າວສານ ເພື່ອເປັນການໂຄສະນາເຜີຍແຜ່ ແລະ ປູກຈິດສຳນຶກໃຫ້ພະນັກງານ-ລັດຖະກອນ ແລະ ນັກສຶກສາ ຂອງຂະແໜງ ເຕັກໂນໂລຊີ ແລະ ການສື່ສານ, ພ້ອມທັງທຸກຄົນໃນສັງຄົມໃຫ້ມີສະຕິ, ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຫຼາຍຂືຶ້ນຕື່ມຕໍ່ກັບຂໍ້ມູນຂ່າວສານໃນການໃຊ້ຄວາມຮຸນແຮງຕໍ່ແມ່ຍິງ, ປັບປ່ຽນທັດສະນະຄະຕິ, ພຶດຕິກຳທີ່ເປັນການໃຊ້ຄວາມຮຸນແຮງໄປສູ່ທັດສະນະຄະຕິເຄົາລົບ ແລະ ນັບຖືກຽດສັກສີຂອງແມ່ຍິງ ແລະ ໃຫ້ຄວາມສຳຄັນ, ບໍ່ໃຫ້ຖືວ່າການໃຊ້ຄວາມຮຸນແຮງເປັນເລື່ອງທຳມະດາໃຫ້ຮັບຮູ້ວ່າການໃຊ້ຄວາມຮຸນແຮງຕໍ່ແມ່ຍິງເປັນສິ່ງທີ່ຍອມຮັບບໍ່ໄດ້ ແລະ ເປັນການລະເມີດສິດທິມະນຸດ ທັງເປັນການທຳລາຍກຽດສັກສີຂອງແມ່ຍິງ ໂດຍສະເພາະຄວາມຮຸນແຮງຜ່ານສື່ດິຈິຕອນຕ່າງໆ ທີ່ເກີດຂື້ນໃນສັງຄົມ ເຊັ່ນ: ການເຢາະເຢີ້ຍ, ການສຽດສີ, ການໃສ່ຮ້າຍປ້າຍສີຜ່ານມື່ດິຈິຕອນ ແລະ ອື່ນໆ.

ຂ່າວ: ພະແນກຄວາມກ້າວໜ້າຂອງແມ່ຍິງ, ແມ່ ແລະ ເດັກ