ວັນທີ 29 ກຸມພາ 2024 ທີ່ ສູນກາງສະຫະພັນແມ່ຍິງລາວ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ໄດ້ຈັດກອງປະຊຸມຜ່ານຮ່າງສະບັບເບື້ອງຕົ້ນ ບົດລາຍງານຕອບຄໍາຖາມເຈາະຈີ້ມ ຕໍ່ບົດລາຍງານແຫ່ງຊາດປະຈຳໄລຍະທີ 10 ກ່ຽວກັບການຈັດຕັ້ງປະຕິບັດສົນທິສັນຍາ ວ່າດ້ວຍການລຶບລ້າງທຸກຮູບການຈໍາແນກຕໍ່ແມ່ຍິງຢູ່ ສປປ ລາວ ນໍາຄະນະ ຮັບຜິດຊອບຮ່າງບົດລາຍງານ ໂດຍການເປັນປະທານ ແລະ ກ່າວເປີດກອງປະຊຸມຂອງ ທ່ານ ປອ ນ. ຈັນໂສດາ ພອນທິບ ຮອງປະທານຄະນະບໍລິຫານງານ ສສຍລ, ຮອງປະທານ ຄຊກມດ; ມີຄະນະກົມຈາກ ສສຍລ, ກະຊວງອົງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຈຳນວນ 27 ທ່ານ, ຊາຍ 5 ທ່ານ.

ກອງປະຊຸມໄດ້ຜ່ານຮ່າງບົດລາຍງານທີ່ກ່ຽວກັບ ສິດທິຂອງແມ່ຍິງ ແລະ ຄວາມສະເໝີພາບຍິງ-ຊາຍ ທີ່ຕິດພັນກັບການແຜ່ລະບາດຂອງພະຍາດໂຄວິດ 19, ຄວາມພະຍາຍາມໃນການຟື້ນຟູຫຼັງໂຄວິດ ແລະ ສະພາບວິກິດການຂອງສາກົນ; ລັດຖະທຳມະນູ, ກອບນະໂຍບາຍ ແລະ ນິຕິກຳການເຂົ້າເຖິງຄວາມຍຸຕິທຳ; ສະຖາບັນສິດທິມະນຸດ, ຜູ້ປົກປ້ອງສິດທິມະນຸດຂອງແມ່ຍິງ; ມາດຕະການພິເສດຊົ່ວຄາວ; ທັດສະນະຄະຕິແບບດັ່ງເດີມຕໍ່ບົດບາດຍິງ-ຊາຍ; ຄວາມຮຸນແຮງບົນພື້ນຖານທາງເພດຕໍ່ແມ່ຍິງ, ການຕ້ານການຄ້າມະນຸດ ແລະ ການຂູດຮີດໂສເພນີ; ການມີສ່ວນຮ່ວມທາງດ້ານການ ເມືອງ ແລະ ຊີວິດທາງສັງຄົມ, ສັນຊາດ, ການສຶກສາ, ການຈ້າງງານ, ແຮງງານເຄື່ອນຍ້າຍເພດຍິງ, ສຸຂະພາບ, ຜົນປະໂຫຍດທາງດ້ານເສດຖະກິດ ແລະ ອື່ນໆ ເພື່ອປັບປຸງຄໍາຕອບໃຫ້ໄດ້ຄວາມເປັນ ເອກະພາບກັນ ແລະ ເປັນເຈົ້າການຮ່ວມກັນນໍາກັນ ໃນການປະຕິບັດພັນທະຂອງລັດພາຄີຂອງ ສປປ ລາວ ໃນການຈັດຕັ້ງປະຕິບັດສົນທິສັນຍາ ວ່າດ້ວຍການລຶບລ້າງທຸກຮູບການຈໍາແນກຕໍ່ແມ່ຍິງ ໂດຍການສະໜອງຂໍ້ມູນ, ສະຖິຕິ ທີ່ຕິດພັນກັບບັນດາຂະແໜງການກ່ຽວຂ້ອງຕ່າງໆ ແລະ ຮຽບຮຽງໃຫ້ເປັນບົດລາຍງານສະບັບສົມບູນຍິ່ງຂຶ້ນ.