ວັນທີ 23 ກຸມພາ 2024, ຄະນະກຳມາທິການ ແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ສູນກາງສະຫະພັນແມ່ຍິງ ລາວ ຈັດກອງປະຊຸມຜັນຂະຫຍາຍມະຕິກອງ ປະຊຸມຄົບຄະນະເປີດກວ້າງຄະນະກຳມາທິການ ແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ປະຈໍາປີ 2023 ທີ່ຫ້ອງປະຊຸມສູນກາງ ສະຫະພັນແມ່ຍິງລາວ ໂດຍການເປັນປະທານ ແລະ ກ່າວເປີດຂອງ ທ່ານ ປອ ນາງ ຈັນໂສດາ ພອນທິບ ຮອງປະທານຄະນະບໍລິຫານງານ ສສຍລ, ຮອງ ປະທານ ຄຊກມດ; ມີບັນດາຫົວໜ້າ-ຮອງຫົວໜ້າ ພະແນກຄວາມກ້າວໜ້າແມ່ຍິງ, ແມ່ ແລະ ເດັກ ກະຊວງ/ອົງການ, ຫົວໜ້າຂະແໜງຄວາມກ້າວໜ້າ ແມ່ຍິງ ແມ່ ແລະ ເດັກ ແຂວງ ແລະ ນະຄອນຫຼວງ ເຂົ້າຮ່ວມທັງແບບເຊິ່ງໜ້າ ແລະ ແບບທາງໄກ.

ການຈັດກອງປະຊຸມຄັ້ງນີ້ ເພື່ອແນະນໍາການຜັນ ຂະຫຍາຍຜົນກອງປະຊຸມຄົບຄະນະເປີດກວ້າງ ຄຊກມດ ປະຈຳປີ 2023 ໂດຍສະເພາະ ທິດທາງ ແລະ ແຜນວຽກບູລິມະສິດໃນການຈັດຕັ້ງປະຕິບັດ ແຜນວຽກປີ 2024 ແລະ ເພື່ອແລກປ່ຽນບົດຮຽນ ໃນການຈັດຕັ້ງປະຕິບັດດ້ານຕັ້ງໜ້າ, ດ້ານຄົງຄ້າງ,ສິ່ງທ້າທາຍ ແລະ ບົດຮຽນທີ່ຖອດຖອນໄດ້ຂອງ ຄກມດ ຂະແໜງການ ແລະ ທ້ອງຖິ່ນແຕ່ລະຂັ້ນ. ພ້ອມນີ້ ຍັງໄດ້ມີການສົນທະນາຖາມ-ຕອບ, ແລກປ່ຽນບົດຮຽນ ແລະ ສົນທະນາປຶກສາຫາລືໃນ ວຽກງານດັ່ງກ່າວ.