ໃນລະຫວ່າງວັນທີ 07-09 ພະຈິກ 2023 ແລະ ໃນລະຫວ່າງວັນທີ 07-09 ທັນວາ 2023 ທີ່ ແຂວງ ອັດຕະປືຕາງໜ້າ ຄກມດ ກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມ ເປັນຄູຝຶກອົບຮົມ ຮ່ວມກັບ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ (ACWC)) ຂອງວາລະການຝຶກອົບຮົມ ໃນຫົວຂໍ້: ການປົກປ້ອງເດັກທາງອອນລາຍ ໃຫ້ຕົວແທນເດັກ ແລະ ໄວໜຸ່ມ 05 ເມືອງ: ເມືອງ ຊານໄຊ, ເມືອງ ໄຊເສດຖາ, ເມືອງ ສາມັກຄີໄຊ, ເມືອງ ພູວົງ ແລະ ເມືອງ ສະໝາມໄຊ ແຂວງ ອັດຕະປື. ໂດຍການເປັນປະທານຮ່ວມຂອງ ທ່ານ ນາງ ສຸກວິໄລ ວົງໄຊ ຮອງປະທານສະຫະພັນແມ່ຍິງ ແຂວງ ອັດຕະປື ແລະ ທ່ານ ສຸວັນທອນ ສຸວັນນະຈັກ ຫົວໜ້າພະແນກສົນທິເດັກ, ຫ້ອງການ ຄຊກມດ, ຄູຝຶກຕາງໜ້າ ກົມຄວາມປອດໄພໄຊເບີ 01 ທ່ານ, ລວມທັງຄູອາຈານ ແລະ ຕົວແທນນ້ອງນັກຮຽນ ຂອງ 05 ເມືອງ ລວມຜູ້ເຂົ້າຮ່ວມທັງໝົດ 120 ທ່ານ, ຍິງ 50 ທ່ານ (ໃນນີ້ເປັນຕົວແທນເດັກ 95 ນ້ອງ, ເດັກຍິງ 40 ນ້ອງ).

ຈຸດປະສົງຂອງການຝຶກອົບຮົມ ແມ່ນເພື່ອຝຶກອົບຮົມໃຫ້ຕົວແທນນັກຮຽນ ໃຫ້ຮັບຮູ້ ກ່ຽວກັບ ການປົກປ້ອງເດັກຈາກການນໍາໃຊ້ ສື່ສັງຄົມອອນລາຍ ໃຫ້ເກີດຜົນປະໂຫຍດ, ມີສະຕິຕໍ່ການບໍ່ຖືກຫຼວງລວງທາງອອນລາຍ ແລະ ອາຊະຍາກໍາທາງລະບົບຄອມພິວເຕີ, ພ້ອມນີ້ຍັງສ້າງໃຫ້ເດັກ ມີຄວາມຮັບຮູ້ ໃນເຂົ້າໃຈຕໍ່ກັບການຫັນເປັນດິຈິຕອນ. ຊຶ່ງໃນໄລຍະການຝຶກອົບຮົມ ເດັກໄດ້ໃຫ້ຄວາມສົນໃຈ ແລະ ມີຄວາມກະຕືລື້ລົ້ນ ໃນການສົນທະນາແລກປ່ຽນຄວາມຮູ້ ແລະ ໄດ້ແບ່ງກຸ່ມຄົ້ນຄວ້າ ພ້ອມທັງນຳສະເໜີຜົນການຄົ້ນຄວ້າຂອງເດັກ ລວມທັງການຮັບຊົມວີດີໂອ ແລະ ການສົນທະນາຖາມ-ຕອບ ໃນຫົວຂໍ້ທີ່ຕິດພັນກັບ ການປົກປ້ອງເດັກ ຈາກການນໍາໃຊ້ສື່ສັງຄົມອອນລາຍ.

ຜ່ານການຝຶກອົບຮົມຄັ້ງນີ້ ແມ່ນໄດ້ບັນລຸຈຸດປະສົງ ແລະ ຄາດໝາຍທີ່ວາງໄວ້ ໂດຍຜ່ານການຕອບແບບຟອມປະເມີນຄວາມຮັບຮູ້ ແລະ ຄວາມເຂົ້າໃຈຂອງຜູ້ເຂົ້າຮ່ວມ ເຫັນວ່າ:

• ຄກມດ ແຂວງ, ບັນດາພະແນກການທີ່ກ່ຽວຂ້ອງຂອງແຂວງ ລວມທັງ ຄູອາຈານ ແລະ ຕົວແທນນັກຮຽນ ທັງ 05 ເມືອງ ມີຄວາມຮັບຮູ້ເຂົ້າໃຈເພີ່ມຂຶ້ນ ກ່ຽວກັບ ການປົກປ້ອງເດັກ ຈາກການນໍາໃຊ້ສື່ສັງຄົມອອນລາຍ ໃຫ້ເກີດຜົນປະໂຫຍດ, ມີສະຕິຕໍ່ການບໍ່ຖືກຫຼອກລວງທາງອອນລາຍ ແລະ ອາຊະຍາກໍາທາງລະບົບຄອມພິວເຕີ;
• ເດັກ ມີຄວາມເຂົ້າໃຈຕໍ່ສິ່ງທີ່ທ້າທາຍ, ສາເຫດ ແລະ ວິທີແກ້ໄຂ ໃນການປົກປ້ອງເດັກຈາກ ສື່ສັງຄົມອອນລາຍ ໂດຍຜ່ານການເຮັດກິດຈະກໍາ, ການຄົ້ນຄວ້າ-ນໍາສະເໜີ, ສົນທະນາຖາມ-ຕອບ ການຮັບຊົມວີດີໂອ ແລະ ກິດຈະກໍາມ່ວນຊື່ນ.

ຂ່າວ ແລະ ພາບ: ກົມຄວາມປອດໄພໄຊເບີ.