ເພື່ອເປັນການສະເຫຼີມສະຫຼອງ ວັນເດັກສາກົນ ແລະ ວັນປູກຕົ້ນໄມ້ແຫ່ງຊາດ(01 ມິຖຸນາ) ຜ່ານມາ, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ(ຄກມດ), ກະຊວງເຕັກໂນໂລຊີ ແລະ ການສື່ສານ (ກຕສ) ຈຶ່ງໄດ້ຈັດກິດຈະກໍາ ມອບອິນເຕີເນັດ ພ້ອມອຸປະກອນຕິດຕັ້ງແບບບໍ່ເສຍຄ່າ ແລະ ດອກໄຟແສງຕາເວັນ ລວມມູນຄ່າທັງໝົດ 12.600.000 ກີບ (ສິບສອງລ້ານຫົກແສນກີບ) ໃຫ້ແກ່ໂຮງຮຽນຄົນພິການທາງການເບິ່ງເຫັນ ທີ່ສູນປິ່ນປົວ ແລະຮັກສາສຸຂະພາບຕາ (ທົ່ງປົ່ງ), ນະຄອນຫຼວງວຽງຈັນ, ໃນວັນທີ28 ມິຖຸນາ 2023ໂດຍການກ່າວມອບຂອງ ທ່ານ ນາງ ຈັນອົບ ສີຫາລາດ, ຮອງຫົວຫນ້າຫ້ອງການ, ຮອງປະທານ ຄກມດ ກຕສ ແລະ ກ່າວຮັບໂດຍ ທ່ານ ນາງ ດຣ. ພອນສະຫວັນ ຈ໋າສານ, ຮອງຫົວໜ້າສູນປິ່ນປົວ ແລະ ຮັກສາສຸຂະພາບຕາ,ມີບັນດາຜູ້ຕາງໜ້າຈາກບັນດາກົມ/ທຽບເທົ່າ, ບໍລິສັດ ອີທີແອລ ຈຳກັດ, ບໍລິສັດ ລາວໂທລະຄົມມະນາຄົມ ມະຫາຊົນ, ບໍລິສັດ ດາວທຽມລາວເອເຊຍ-ປາຊີຟິກ ຈຳກັດ, ບໍລິສັດ ໄປສະນີລາວ ຈຳກັດ,ພະນັກງານ, ຄູອາຈານ ແລະ ນ້ອງໆນັກຮຽນ ຈາກໂຮງຮຽນ ຄົນພິການທາງການເບິ່ງເຫັນ ທີ່ສູນປິ່ນປົວ ແລະ ຮັກສາສຸຂະພາບຕາ ເຂົ້າຮ່ວມ.

ຈຸດປະສົງ ກໍເພື່ອເປັນການສືບຕໍ່ຈາກປີທີ່ຜ່ານມາ ໃນການປະກອບສ່ວນຊ່ວຍເຫຼືອຜູ້ດ້ອຍໂອກາດໃນສັງຄົມ ໃນການໄດ້ຮັບການເບິ່ງແຍງເອົາໃຈໃສ່, ພັດທະນາ, ປົກປ້ອງ ແລະ ມີສ່ວນຮ່ວມໃນຂະບວນການພັດທະນາ ແລະ ສ້າງສາປະເທດຊາດ. ໃນໂອກາດດັ່ງກ່າວນີ້, ສູນປິ່ນປົວ ແລະ ຮັກສາສຸຂະພາບຕາ ກໍໄດ້ມອບໃບສົມມະນາຄຸນໃຫ້ແກ່ ກະຊວງເຕັກໂນໂລຊີ ແລະ ການສື່ສານ ອີກດ້ວຍ.