ວັນທີ 21 ພະຈິກ 2023 ທ່ານ ນາງ ຈັນອົບ ສີຫາລາດ ຮອງຫົວໜ້າຫ້ອງການ, ຮອງປະທານ ຄກມດ ພ້ອມດ້ວຍພະແນກ ຄກມດ ແລະ ພະນັກງານຈາກກົມຄວາມປອດໄພທາງໄຊເບີ ເຂົ້າຮ່ວມກອງປະຊຸມທົບທວນການຈັດຕັ້ງປະຕິບັດວຽກສິດທິເດັກ ຢູ່ ສປປ ລາວ ໃນໂອກາດວັນ ສົນທິສັນຍາ ວ່າດ້ວຍ ສິດທິເດັກ (ວັນເດັກໂລກ 20 ພະຈິກ 2023) ທີ່ຫໍປະຊຸມແຫ່ງຊາດ,​ ນະຄອນຫຼວງວຽງຈັນ;  ກອງປະຊຸມດັ່ງກ່າວ ໃຫ້ກຽດກ່າວເປີດພິທີໂດຍ: ທ່ານ ສຈ. ປອ. ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ປະທານ ຄຊກມດ; ມີ ທ່ານ ນ. ອາລີ ວົງໜໍ່ບຸນທໍາ ປະທານຄະນະບໍລິຫານງານ ສສຍລ, ຮອງປະທານ ຜູ້ປະຈໍາການ ຄຊກມດ ແລະ ທ່ານ ດຣ ນ.ເພຍ ເຣເບວໂລ ບຣິດໂຕ ຜູ້ຕາງໜ້າອົງການ ຢູນິເຊັບ ປະຈໍາ ສປປ ລາວ; ພ້ອມດ້ວຍຄະນະນໍາຈາກກະຊວງ-ອົງການ, ຮອງເຈົ້າຄອງນະຄອນຫຼວງວຽງຈັນ, ຮອງເຈົ້າແຂວງ, ອົງການຈັດຕັ້ງສາກົນ, ຕາງໜ້ານ້ອງນັກຮຽນຈາກ 18 ແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມດັ່ງກ່າວເເມ່ນຈັດຂຶ້ນໂດຍ ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ຮ່ວມກັບ ອົງການ ຢູນີເຊັບ ກອງປະຊຸມຄັ້ງນີ້ ເປັນສ່ວນໜື່ງຂອງການສະເຫຼີມສະຫຼອງ ວັນເດັກໂລກຕະຫຼອດໄລຍະ 34 ປີ  ເເລະ ໂອກາດຄົບຮອບ 50 ປີ ຂອງການຮ່ວມມືລະຫວ່າງ ລັດຖະບານເເຫ່ງ ສປປ ລາວ ເເລະ ອົງການ ຢູນິເຊັບ ພາຍໃຕ້ຄໍາຂວັນ: “ການລົງທຶນໃນອານາຄົດຄືການລົງທຶນໃສ່ເດັກ”; ເພື່ອສະຫຼຸບລາຍງານການຈັດຕັ້ງປະຕິບັດຄຳໝາຍໝັ້ນຂອງບັນດາແຂວງໃນຂອບເຂດທົ່ວປະເທດໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າກ່ຽວກັບວຽກສິດທິເດັກ ຢູ່ໃນ ສສປ ລາວ; ໂອກາດທີ່ມີຄວາມໝາຍສຳຄັນນີ້ບັນດາທ່ານຮອງລັດຖະມົນຕີ, ບັນດາຮອງເຈົ້າແຂວງ ແລະ ອົງການຈັດຕັ້ງສາກົນ ໄດ້ລາຍງານຜົນຂອງການຈັດຕັ້ງປະຕິບັດໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ເຊີ່ງເຫັນວ່າມີຜົນງານທີ່ສຳເລັດຫຼາຍດ້ານ; ໄປຄຽງຄູ່ກັນນີ້ກໍປາສະຈາກບໍ່ໄດ້ຕໍ່ຈຸດອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ແກ້ໄຂໃນຕໍ່ໜ້າໃຫ້ມີຜົນສຳເລັດເປັນກ້າວໆ.

ນອກຈາກນີ້ກອງປະຊຸມດັ່ງກ່າວຍັງໄດ້ມີ​ການ​ນຳ​ສະ​ເໜີ​ຜົນຈາກກອງປະຊຸມ​ປຶກສາ​ຫາລືກັບໄວ​ໜຸ່ມ​ທີ່ໄດ້​ຈັດ​ຂຶ້ນ​ໃນ ວັນທີ 18-20 ພະຈິກ 2023 ຜ່ານມາ, ໂດຍໄດ້ເຕົ້າໂຮມເດັກ ແລະ ໄວ​ໜຸ່ມທີ່ເປັນຕົວແທນ ຈາກ 18 ​ແຂວງ ທົ່ວປະເທດ ຮ່ວມກັນຄົ້ນຄວ້າ,​ ສະເເດງຄວາມຄິດເຫັນ ແລະ ວິທີແກ້ໄຂຕໍ່ກັບບັນຫາຕ່າງໆທີ່ມີຜົນກະທົບຕໍ່ການດຳລົງຊີວິດພວກເຂົາເຊັ່ນ: ການປົກປ້ອງເດັກທາງອອນລາຍ, ຜົນກະທົບຕໍ່ການປ່ຽນແປງດິນຟ້າອາກາດແລະໄພພິບັດຕໍ່ເດັກ ແລະ ຜົນກະທົບຂອງການແຕ່ງດອງກ່ອນໄວແລະການຖືພາຂອງເດັກ.

ຜົນໄດ້ຮັບ​ຂອງ​ກອງປະຊຸມ​ຄັ້ງ​ນີ້​ ແມ່ນເພື່ອເປັນການຍົກໃຫ້ເຫັນເຖິງຄວາມມຸ່ງໝັ້ນຂອງ ສປປ ລາວ ໃນການຮັບປະກັນການສົ່ງເສີມສິດທິເດັກ,​ ສ້າງຄວາມເຂັ້ມແຂງ ແລະ ຄວາມເປັນຢູ່ທີ່ດີ ສໍາລັບເດັກລາວບັນດາເຜົ່າ.