15/08/2023
ຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ກະຊວງເຕັກໂນໂລຊີ ແລະ ການສື່ສານ (ຄກມດ ກຕສ) ໄດ້ເປີດຊຸດຝຶກອົບຮົມສ້າງຄວາມເຂັ້ມແຂງດ້ານທັກສະ, ພາວະຄວາມເປັນຜູ້ນນໍາໃຫ້ແກ່ພະນັກງານເພດຍິງ ຂະແໜງເຕັກໂນໂລຊີ ແລະ ການສື່ສານ ໃນການຫັນເປັນດິຈິຕອນ, ໂດຍພາຍໃຕ້ການເຂົ້າຮ່ວມເປັນປະທານ ແລະ ກ່າວເປີດຊຸດຝຶກອົບຮົມ ຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ, ປະທານ ຄກມດ ກຕສ, ຊຶ່ງມີນັກສໍາມະນາກອນຈາກຫ້ອງການ, ບັນດາກົມ, ອົງການ, ສູນ, ສະຖາບັນ ແລະ ບໍລິສັດ ທີ່ໃຫ້ບໍລິການດ້ານໂທລະຄົມມະນາຄົມ, ໄປສະນີ ອ້ອມຂ້າງ ກຕສ ພ້ອມດ້ວຍພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ເຂົ້າຮ່ວມທັງໝົດ 60 ກວ່າທ່ານ.
ໃນໂອກາດກ່າວເປີດຝຶກອົບຮົມ, ທ່ານ ຮອງລັດຖະມົນຕີ ໄດ້ກ່າວວ່າ: ຈຸດປະສົງຂອງການເປີດຊຸດຝຶກອົບຮົມຄັ້ງນີ້ ກໍເພື່ອຍົກລະດັບຄວາມຮູ້, ຄວາມສາມາດຂອງພະນັກງານເພດຍິງ ໃຫ້ມີຄວາມພ້ອມ ເພື່ອກ້າວເຂົ້າໃນຍຸກແຫ່ງການຫັນໄປສູ່ການນຳໃຊ້ເຕັກໂນໂລຊີດິຈິຕອນ, ນຳໃຊ້ໄອຊີທີເຂົ້າໃນວຽກງານຮອບດ້ານ, ສົ່ງເສີມໃຫ້ມີຫົວຄິດປະດິດສ້າງທີ່ທັນສະໄໝ ແລະ ມີສ່ວນຮ່ວມໃນການພັດທະນາເສດຖະກິດ-ສັງຄົມ ແລະ ຍົກລະດັບຊິວິດການເປັນຢູ່ໃຫ້ສູງຂຶ້ນ. ພ້ອມນັ້ນ, ທ່ານຍັງຮຽກຮ້ອງໃຫ້ນັກສໍາມະນາກອນ ຈົ່ງພ້ອມຈິດພ້ອມໃຈກັນ ສືບຕໍ່ຄົ້ນຄວ້າ, ບຸກບືນ ໃນການພັດທະນາຕົນເອງຢູ່ຕະຫຼອດເວລາ ເພື່ອໃຫ້ມີທັກສະດ້ານເຕັກໂນໂລຊີການສື່ສານ ແລະ ຂໍ້ມູນຂ່າວສານສູງ, ເປັນກຳລັງແຮງກ້າວສູ່ສັງຄົມເສດຖະກິດພູມປັນຍາ, ນະວັດຕະກຳດ້ານ ໄອຊີທີ, ສາມາດຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ເພື່ອປະກອບສ່ວນໃນການສ້າງສາ ແລະ ພັດທະນາປະເທດຊາດ ກໍຄື ຄວາມຮຽກຮ້ອງຕ້ອງການຂອງການເຊື່ອມໂຍງກັບພາກພື້ນ ແລະ ສາກົນ.
ການຝຶກອົບຮົມໃນຄັ້ງນີ້ ແມ່ນຈະໄດ້ດໍາເນີນເປັນເວລາ 03 ວັນ ເລີ່ມແຕ່ວັນທີ 15-17 ສິງຫາ 2023, ທີ່ຫ້ອງປະຊຸມໃຫຍ່ ຊັ້ນ 5 ຂອງ ກຕສ. ໃນຊຸດຝຶກອົບຮົມຄັ້ງນີ້, ບັນດາຜູ້ເຂົ້າຮ່ວມຈະໄດ້ຮັບຟັງການເຜີຍແຜ່ເນື້ອໃນເອກະສານທີ່ສໍາຄັນຕ່າງໆເຊັ່ນ: ທັກສະການເປັນຜູ້ນຳໃນຍຸກ ດິຈິຕອນ, ຄວາມສໍາຄັນຂອງສາມເສົາຄໍ້າໃນການຫັນເປັນດິຈິຕອນ, ການເລືອກ ແລະ ການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພໃນຍຸກດິຈິຕອນ, ທັກສະກ່ຽວກັບການນຳໃຊ້ເຕັກໂນໂລຊີດິຈິຕອນເຂົ້າໃນການເຮັດວຽກຕົວຈິງ, ສະພາບການຫັນເປັນດິຈິຕອນ ແລະ ລັດຖະບານດິຈິຕອນ ແລະ ລະບົບບໍລິຫານລັດດິຈິຕອນ ຊຶ່ງນໍາສະເໜີໂດຍນັກວິທະຍາກອນພາຍໃນກົມ/ທຽບເທົ່າ ຂອງກະຊວງເຕັກໂນໂລຊີ ແລະ ການສື່ສານ (ກຕສ) ເປັນຕົ້ນແມ່ນ: ສູນສົ່ງເສີມ ແລະ ຖ່າຍທອດເຕັກໂນໂລຊີ, ສູນບໍລິຫານລັດດິຈິຕອນ ແລະ ກົມເຕັກໂນໂລຊີດິຈິຕອນ. ພ້ອມນີ້, ບັນດາຜູ້ເຂົ້າຮ່ວມຍັງຈະໄດ້ພ້ອມກັນຄົ້ນຄວ້າ ສົນທະນາແລກປ່ຽນຄວາມຮູ້ນຳບັນດານັກວິທະຍາກອນ ແລະ ນັກສໍາມະນາກອນດ້ວຍກັນ ເພື່ອນໍາເອົາເນື້ອໃນໄປຜັນຂະຫຍາຍເຂົ້າໃນວຽກງານຕົວຈິງ ໃຫ້ມີປະສິດທິພາບ ແລະ ເກີດປະສິດທິຜົນສູງສຸດ.
ເນື້ອໃນຂ່າວ: ພະແນກຄວາມກ້າວໜ້າຂອງແມ່ຍິງ ແລະ ແມ່-ເດັກ
ເນື້ອໃນຂ່າວ: ພະແນກຄວາມກ້າວໜ້າຂອງແມ່ຍິງ ແລະ ແມ່-ເດັກ
